١. فكرة عميقة بلغة بسيطة، الفزلكة في اللغة هتخلي اللى مش فاهم هينفر ومش هيستفيد، فلازم تكلم المثقف وميحسش انك عادي ومينفعش يكون عندك فكرة تنفع حد ومتوصلش للشخص البسيط.
٢. لغة عربية معاصرة بلاش جو بقي اللغة القرشية ساعدوا الناس على القراءة
٣. سمعت دكتور احمد صلاح هاشم امبارح وهو بيوصف كلمة تأليف وأنها جاية من ألف، وإن أحنا بنألف الكلمات على بعض، فأوعي تفتكر انك بتقلد فكرة وانها مهروسة لأن تأليفك لنفس الفكرة بيبقي ليها وقع مختلف على الآخرين.
٤. بلاش مصطلحات معقدة الا في حالة الدراسة الاكاديمية، الناس مش هتقول الله ده حافظ المنهج، هيقولوا مفهمناش حاجة
٥. لما تعمل كتاب اعمله كامل بلاش شغل أن الناس تجيلي، بمعني أعرض المشكلة واثاره والحل وطريقة تطبيقه، ومتخافش الناس هتجيلك وهتدعيلك.
٦. النجاح كشاف نور هيبقي ليك أعداء بسببه، وأضاءة الكشاف هتتسلط عليك يوما ما وهتظهرك، اجتهد ومتنساش لما النور يجي عليك وتظهر انك تفضل مجتهد وكمل لأن وقتها هتبقي محقق هدف كبير ويمكن كنت فاكر انه الهدف الأكبر ولكن لما هتكون في المرحلة دي هتشوف الدنيا برؤية أوسع، فكمل في اجتهادك لأن الكشاف هيلف تاني فخلى ليك دور في النور.
٧. افتكر انك هتموت فسيب أثر وخاف اوي من كل كلمه انت بتكتبها وبتقولها، عشان يا اما هتحيي بيها إنسان أو هتموته
٨. لو انت كاتب لازم تكتسب مهارة التحدث حتى لو مش هتطلع على الاستيدج ولو انت متحدث لازم تكون كاتب حتى لو مش هتعمل كتاب ولكن أنت مؤثر في المجتمع فلازم تشتغل على نفسك
٩. اقتنع انك بني ادم عادي وبتغلط ولكن متشجعش الناس على غلطك وتقول انه عادي، صلح من نفسك قدر المستطاع وده مش نفاق ده انت شخص بتحاول تكون كويس واعرف ان الناس اللى هتبقي كويسة بسبب كلامك ده هيكون طاقة إيجابية جيالك تاني
١٠. قوة السوشيال ميديا مش قليلة اشتغلها صح
١١. قوة العمل الجماعي مهمة جدا اتعلم احترام كل فرد بيعمل حاجة عشان يساعدك في عملك
١٢. اتعرف على الناس واعمل علاقات كويسة
١٣. مش معني انك كاتب متساعدش كاتب في كتابه، خليك كريم واتعامل مع الحياة بنظرية الاتساع، في أفكار كتير جدا ساعد غيرك بفكرك عادي وطوره وحتى لو مكتبش اسمك لأن نجاحه هتبقي انت جزء منه
١٤. متبطلش تعليم
١٥. اتعلم التفكير النقدي
١٦. المعرض مش نهاية المطاف سواء حققت مبيعات أو لا اشتغل على نفسك
١٧. اتقبل النقد البناء مش بس كدا اجري ورا النقاد وخليهم يقولولك ايه نقط ضعفك ونقط قوتك واشتغل عليهم
١٨. خلى جواك ثقة بنفسك وبلاش تستمد ثقتك من الناس
١٩. اوعي تتكبر لأحسن تاخد القلم اياه
٢٠. نزولك المعرض مهم جدا هتتعلم كتير اوي ونتعرف ناس كتير وهتتعامل مباشرة مع القراء
هدير القصاص
